|
|
تيق-تيق خانيم
سهمانلايان: چيچك خانيم
بير گون واريدي بير گون يوخيدي آللاهدان سونرا هئچ كس يوخيدي. بير بالاجا بؤجك دنيايا تازا گؤز آچميشدي. تكجه دولانيردي. يولدا بير جوت بادام قابيغيني اؤزونه باشماق ائديب گولدن اؤزونه بير دامن دوزلدير. سونرا دوشور چؤللري گزمگه:
سورمه چكديم گؤزومه
دوشدوم چؤلون دوزونه
دوْست گزيرم اؤزومه
دوْست گَل هارداسان
تئز گل هارداسان تيق تيق تيق
دوْست گَل هارداسان
تئز گل هارداسان تيق تيق تيق
يوْل اوستونده بير قويون سوروسونه راست گلير. چوْبان اونو گؤروب دئيير:
- قارا قيز ! هارا گئديرسن؟
- هئ بورا باخ ! قارا اؤزونسن ! من ساچي
سوراي خانيمام، دوْنو
داراي خانيمام !
- ياخشي. آي خانيم
هارا گئديرسن بئله؟
- چَره گئديرم چوره
گئديرم. سنه ناوار
هارا گئديرم؟ اؤزومه دوست آختاريرام.
- دوست آختاريرسان؟ من حاضير !
- ايشدي بيردن آجيقلانديرسام سني ، نه‌ايله وورارسان مني؟
چوبان اَل آتيب آغاجين گؤتورنده بالاجا بؤجك قاچدي.
چؤلده گزمگه ايدامه وئردي وگزه-گزه اوخويوردو:
باخديم باخديم گوزگويه
باخديم باخديم اؤزگه‌يه
قورخدوم قورخدوم گؤز دَيه
آه گؤزلم من، واه گؤزلم من تيق تيق تيق
آه گؤزلم من، واه گؤزلم من تيق تيق تيق
يول اوستونده تولكو بَيه راستلاشير.
تولكو: نازلي خانيم،
دوزلو خانيم خئير اولا،
هارا بئله؟
- چره بئله چوره بئله،
سنه ناوار هارا بئله؟
اؤزومه دوست آختاريرام.
- دوست آختاريرسان؟ مندن ياخشي دوست هاني؟
- ايشدي بيردن آجيقلانديرسام سني نه‌ايله وورارسان مني؟
- سالارام سني ديشيمه، اَزه‌رم !
بؤجك بئله ائشيدنده قاچدي. يئنه گزيب اوخودو:
چمنده چيچك قوْشا گؤيده كپه‌نك قوْشا
سودا باليق تك دئييل يووادا بؤجك قوْشا
ياخينليقدا سيچان بَي اونون سسين ائشيديب گلير يانينا و دئيير:
- تيق تيق خانيم، ساچي سوراي خانيم، دوْنو داراي خانيم، هارا گئديرسن؟
- چره گئديرم چوره گئديرم ، سنه ناوار هارا گئديرم ؟ اؤزومه دوست آختاريرام.
- گل ايكيميز دوست اولاق، بير يئرده ياشيياريق، يوكوموزده آز
اولار.
- ايشدي بيردن آجيقلانديرسام سني نه‌ايله وورارسان مني؟
قويروغوما ياغ چكرم، بال
چكرم، ياناغيوا خال چكرم.
- ياخشي، من راضي.
تيق تيق خانيم لا سيچان
بَيين تويو اولور.
گونلرين بيرينده سيچان بَي تورباسين گؤتوروب دئيير:
- خان پيشگي، بَزي‌ييب ائو ائشيگي توْيودو. گئديم اَليمه كئچندن داشي‌ييم ائوه، دار گوندن اؤترو !
- بس من؟
- اورا گئتمك خطاليدير،
اوْتور ائو ائشيگه باخ !
سيچان بَي چوخ زحمتله
خان پيشيگين ائوينه گئدير
و يئمك ييغماغا چاليشير. نئچه دفعه آز قالميشدي پيشيكلر
اونو يئسينلر. سيچاني بوردا قوياق گئدك گؤرك تيق تيق خانيم نه ائدير.
تيق تيق خانيم سو گتيرمك اوچون چايا گئتميشدي. اوردا غملي- غملي اوْتورموشدو. كيرپي بَي اوردان رد اوْلوردو كي سوروشدو:
- نه اولوب؟ كئفين يوخدو !
- سيچان بَي اؤزو كئفده، مني تك قويوب ائوده. يوخ اوندان منه دوست اولماز. گل سن‌ايله دوست اولاق.
- هه هه هه منيم اؤز دوستلاريم اؤزومه بسدير هه هه هه . . .
تيق تيق خانيم بئله بيليردي كي سيچان بَي داها اونو سئومير. اونا گؤره ائوه قاييتماغي گلميردي كي بيردن سو قابيني سو آپاردي. اونو توتماق ايسه‌يَنده
اؤزوده سويا دوشدو. بو
حالدا خان ائوينه گئدن بير
آتلي چاي قيراغيندان
سوْووشوردو. تيق تيق
خانيم اونو گؤروب
قيشقيرماغا باشلادي:
آي گئدن آتلي، اَلي باراتلي
خان ائوينه گئدرسن
جيرتلاتلا يئيرسن
سيچان قولو بَيه دئيرسن:
تيق تيق خانيم ساچي سوراي خانيم، دونو داراي خانيم
دوشوب دره چوخورونا ، تئز اؤزونو چاتدير اونا.
سيچان بَي خانين ائوينده جاني اوْوجوندا يئمك ييغماغا چاليشيردي كي بيردن پيشيكلرين بيرندن بئله بير سؤز ائشيتدي:
تيق تيق خانيم ساچي سوراي خانيم، دونو داراي خانيم
دوشوب درين چايا ،
آز قاليب آخيرا
سييچان دؤزنمه‌ييب اؤزونو
چايا چاتديردي. اَليني
تيق تيق خانيما ساري اوزالديب دئدي:
- اَليني منه بَسته‌ره‌جيك !
- يوخ يوخ من سندن كوسته‌ره‌جيك !
- اَليني منه بَسته‌ره‌جيك !
- يوخ يوخ من سندن كوسته‌ره‌جيك !
- اَليني منه بَسته‌ره‌جيك !
- يوخ يوخ من سندن كوسته‌ره‌جيك !
- كوسته‌ره‌جيك؟ كوسته‌ره‌جيك ، منده سنه قويروق گؤسته‌ره‌جيك.
سيچان بونو دئييب داليسين چئويردي. تيق تيق خانيم اونون قويروغوندان ياپيشيب ائشيگه چيخدي. آما سيچان گئتدي و تيق تيق خانيم يئنه تك قالدي و يانيقلي-يانيقلي اوخوماغا باشلادي:
بير كؤرپه بؤجگم من
چيچكله قونچه‌يم من
دوست تاپماديم تاپماديم
تكجه‌يم تكجه‌يم من
سون