|
|
قره‌مليگين بؤيوك پاركي
گوزاريش: محمد تدين قراملكي
او گون آخشام قره مليكدن بير گوزاريش توتماغا ائودن ائشيگه چيخديم. بيرنجي نظريمه گلن يئر قره مليگين بؤيوك پاركي اولدو. پيادا پاركا طرف يوللانديم. پارك قره‌مليگين گونئي-باتيسندا 14 هيكتار مئتراژينان يئر آليب. اصلي قاپيسي گونئي طريفينده‌دير. بو پارك 1381 جي ايلينده شهرداري منطقه 6 واسيطه‌سي‌نن بئش‌يوز ميليون تومن هزينه‌اينن دوزه‌ليب. آخشاملار جماعات گزيب دولانماغا و ياشيل فضادان ايستيفاده ائتمك اوچون بو پاركا گليرلر.
اوشاقلارين
اويناماغينا جوربه‌جور
ايمكانلار يارانيب. فوتبال، واليبال، بسكيتبال،هنديبال مئيدانلاري حاضيرلانيب.
طبيعتين گؤزلليكلرين پاركدا بوتونلتمك اوچون بير گؤل ده دوزلديليب. كيچيك اوشاقلار
اوچون‌ده
اويناماغا مخصوص مئيدان وار.
سؤز سوروشماغا بير نفر آختاريرديم كي محله اوشاقلاردان نئچه‌سين فوتبال اويناماقدا گؤردوم. ائله‌كي بيلديلر قره‌مليك سايتيندان گلميشم، ياخينا گليب نظرلرين دئمَگه باشلاديلار.
فوتباليست يئني‌يئتمه‌لر
آزجا اوتانيرديلار. اونلار ابوذر كوچه‌سي‌نين
«آبي پوشان» فوتبال تيمي‌نين
اويونچولاري اولدوقلاريني دئديلر كي تمرينه مشغولدولار. آدلاري: بهرام مؤتمن، جلال
ساعد، امير امين، علي حسيني، جواد پوركاظميان، اميد عقيلي، علي اكبر موسيان، محمد
مايلي، محمد احمدي، احمد زيرك، آرزومند، حسينيان.
بو ايمكانلارين يارانماسينا شهرداري‌دان تشكّور ائديرديلر. آما بير نئچه آزليقلاري‌دا سايديلار:
1. مئيدانلارين وساييلي كاميل دئييل. بعضيسي‌نين تورو يوخدو.
2. فوتبال مئيداني‌نين چمني موناسيب دئييل.
3. فوتبال مئيداني دوغودان باتي‌يه اوزانيب كي سحر و آخشام گون اويونچولارين گؤزلرينه دوشور.
يئني‌يئتمه‌لرين بيري تبريزين قوناقلاريندانيدي. آقاي ربيعي‌نين 16 ياشي وار و 2 ايل بوندان قاباق آتاسي‌نين ايشي تبريزه مونتقيل اولدوغو اوچون بورا گليبلر. دئديگي كيمي 3 آيدا توركي ديليني اؤرگه‌شيب.
