|
|
بسم الله الرحمن الرحيم
نييه آللاه قاپي‌سيندا دوعالاريميزين هاميسي موستجاب اولمور؟
صمد كامران قراملكي
هر ايشين گؤرولمه‌سي ايكی عاميلدن آسيليدير: بيري فيزيكي و بيريسي رواني. فيزيكي عاميل بيزيم بدنيميز و اليميزده اولان وساييلدير كه موستقيم اولاراق ايكينجي عاميل يعني روح و روانيميزا باغليدير. اينسانين روحودور كي اونون جيسمين كونترول ائديب اونا گوج و باشاري وئرير يا عكسينه گوجون اليندن آلير. بو، روحون قودرتيدير كي اونون غريزه‌سينه يئنيب(غلبه ائديب)بئلينه نارينجك باغلاديب دوشمن‌نين تانگي آلتينا آتير، بو روحون قودرتيدير كي بير اينسانا توپ لوله‌سيني قيلينج‌ايله ايكي بؤلمگه ايمكان وئرير. آيري طرفدن بو روحدور كي ساغلام و گوجلو اينسانين باشين گيجلله‌نديريب اونو اوجا يئردن آشاغي سالير اوردا كي اينسان اوجاليقدا اولاركن قورخور و قورخو اونون باشين گيجلله‌نديرير.
بوردا روحون گوجونو تماماً گؤروروك. يعني روح اينسانين هانسي يؤنه گئديب نه ايش گؤره‌جگيني تعيين ائدير. بونا اساساً موقدّس دينيميز ايسلام اينسانين روحونو گؤزلـله‌ديب صفالانديرماغا سئويملي بير يول قويوب. بو يولون آدي دوعادير. دوعا بير دولو خزينه كيمي، بير گونش كيمي اينسانين روحون ايشيقلانديرير، صفالانديرير و اونا آللاه قارشيسيندا اولان وظيفه‌لرين يئرينه يئتيرمگه گوج وئرير. هر كيم بو دولو خزينه‌يه وصل اولسا تانري‌نين حضوروندا ابدي بير موتلولوق و سعادته چاتار.
گؤره‌سن بيزلر بو خزينه‌يه اَل تاپميشيق يا يوخ؟
بيز هر واخت بير موشكوله چاتاندا يا بير شراييطي به‌ينمه‌ييب، دگيشمه‌سيني ايسته‌ينده اللريميزي آللاها ساري اوزالديب دوعا ائتمگه باشلاييريق و اينتظاريميز اولار دوعاميز تئز موستجاب اولسون. بعضي واختلار ايستكلريميز موستجاب اولار آما چوخلو ايستكلريميزي اله گتيره بيلمه‌ريك. گؤره‌سن نييه؟
يارادان بيزه اؤزو بيلديگي مصلحتلر اساسيندا چوخلو نئعمتلر وئريب، بير پاراسيندان‌دا محروم قويوب. بو دونيادا ياشاييب آخيرت دونياسينا ياخشي عمل‌لر ذخيره ائتمگه يوللار گؤرسه‌ديب. دوغرو موسلمانلار اؤز وظيفه‌لرينی بو يولدا لاپ ياخشي يئرينه يئتيرمك اوچون گرك اؤزلرين تاني‌ييب اينسانين خيلقت هدفلری‌ن نظرده آلماقلا كمال و يئتگينلشمگه دوغرو يوروسونلر. اینسان دوعانی اورکدن و بوتون اینامینان ائتسه عمللری‌نین هامیسی دوز و تانری‌یا ساری اولار.
دئییللر دوعا اؤزل شراییطده اثرلی اولوب یئرینه چاتار. تانری تعالی بو شراییطی اوچ مورد ساییب:
1. اورکدن و خالیصانه و بوتون اینامینان:
مؤمن سوره‌سی 14 نجو آیه : فَادعُوا اللهَ مُخلِصینَ لَهُ الدّینُ و لَو کَرِهَ المُشرِکونَ
اوره‌گيز خاليص اولارکن آللاها دوعا ائدين و لوو کافيرلره خوش گلمه‌يه.
2و3. يالوارما حالي و گيزلين
اعراف سوره‌سی 55 نجی آیه : اُدعُوا رَبَّکُم تَضَرُّعاً و خُفیَةً
تانريزا يالوارماق و گيزلی حالدا دوعا ائدين
باخاق گؤرک دوعا ائدنده نه حالدا اولاريق. . . ..
بيزی‌ده دوعا ائدین
هفته گو‌نلري‌نين ذ‌يکرلری:
شـــنـــبـــه:............................یا ربّ العالمین
شنبه صاباحی:.............................یا ذَالجلالِ والاِکرام
هفته اوچو :............................ ....یا قاضیَ الحاجات
چرشنبه آخشامی:.................. .....یا اَرحَمَ الرّاحِمین
چرشنبه:.................................. ...یا حیُّ یا قیّوم
جومعه آخشامی:................... .....لا اِله اِلاّ الله مَلِکُ الحقُّ المبین
جــومــعـــه:..................... .... اللّهمَّ صَلِّ عَلی مُحمّدٍ وَ آلِ مُحمدٍ
نقل از وئبلاگ: wwww.din-xadimi.blogfa.com