|
|
بوردا بیر سئوگی یاتار
اصلی و کرم» ناغیلینی بیر چوخوموز ائشیتمیش و یا اوخوموشوق. بو ناغیلین چرده‌یی*، «کرم» آدیندا بیر موسلمان« تورکون،« اصلی» آدیندا بیر مسیحی ارمنی قیزا اولان عشقینی آنلادیر. بو ناغیل، بیر تورکون بیر ارمنییه بو قدر تمیز بیر سئوگی بسله‌یه بیلمه‌سییله بیرلیکده، اصلی‌نین کشیش اولان باباسینین بونا کسگین موخالیف چیخماسی ایله، بو تمیز سئودایی، نیسگیللی بیر عاقیبته دوچار ائتدیگینی گؤستریر. ایکی سئوگیلی‌یی بیربیریندن اوزاق توتماق اوچون، عاییله‌سینی گؤتوروب یوللارا دوشن کشیشی، کرم هئچ یورولمادان تعقیب ائدیر. کشیش، بو عشقین صمیمیتی‌نین قارشیسیندا چاره‌سیز قالینجا، اصلی‌یی توخونولماغا* قارشی طلسم ائله‌ییر. کرم نهایت اصلییه اولاشیر آمما اونا توخونونجا اود توتوب یانیر. اصلی‌ده یانیر و بئله لیکله بو سئودا، بابانین عینادکار خویلارینا* قوربان گئدیر.
اصلی‌نین آتاسینین «قره‌ملیک» آدی و یا لقبینی داشیدیغی دئییلیر. ایندی ایسه بو آددا، تبریزین غربینده بیر قدیمی یئرلشیم یئری* و اونون‌دا یاخینلیغیندا اصلی و کرمه عایید اولدوغو سؤیله‌نن ایکی مزار واردیر.
بو یازیدا اساس آلدیغیم «قره‌ملیک محله‌سی»نین، حتی قدیم زامانلاردا بیر پادشاهین گتیرتدیگی بؤیوک بیر ارمنی قافیله‌سینین، بورایا یئرلشمه‌سییله دوزلدیگی ایدیعا ائدیلیر. بونلار و بنزر حیکایه‌لر، نه اولورسا اولسون، ایندی قره‌ملیک محله‌سی، اصلی و کرمین روحونو داشیماقلا بیرلیکده، بوتونویله موسلمان-تورک اینسانلاردان تشکیل تاپیر
سون زامانلارا قدر بیر کند ساییلان قره‌ملیک، بیر بیرلرینی تانییان و یاخین ایلیشکیلری* اولان اینسانلاری و تبریز کیمی، تاریخده دونیانین گؤزده اولان بیر شهرینه یاخین اولماسی سایه‌سینده، ده‌ییشیک ایدئولوژی و آنلاییشلارا صحنه اولموش و تأثیر گوجونو –مثبت و یا دا منفی- گؤسترمیشدیر. یاخین تاریخه عایید اولان مشروطه حرکتلری، آذربایجان دئموکرات
فیرقه سی جریانلاری، و 57 اینقیلابی، بونون گؤسترگه‌لریدیر.
قره‌ملیک» قونوم* اعتیبارییله گونئیدن گوجووار و راواسان، شرقدن شام قازان و خانه‌سازی (پیچیلر)، قوزئیدن آجی چای و فورودگاه، غربدن مایان کند و محله‌لرینه دایانماقدادیر. قره‌ملیگین نوفوسو30000 حودودینده‌دیر و یئتیشدیریب مملکته تقدیم ائتدیگی آیدین، روحانی و بیلگین ساییسی، نوفوسونا گؤره یاخشی سطحده‌دیر.
محله، بابا-بالا دیکتاتوریسی زامانیندا یئتیشیلمه‌ییب، حتی دؤوره‌سینه –قره‌ملیکلی‌نین چالیشماسینا مئیدان وئریلمه‌ین شکیلده- صنعتی مرکزلر قورولاراق و دمیر یولویلا شهره اولان طبیعی باغلانتیسی کسیله‌رک، محرومیتده قالمیشدیر. دیگر طرفدن‌ده، آجی چایین طبیعی دورومو، بیر زامانلار سویو حیات بسله‌یه بیلرکن، یوخاری اللرده قورولان گرکسیز سدلرله آخینتی‌نین کسیلمه‌سییله، کارخانالارین شیمیایی ضاییعاتی و فاضلاب تؤکونتولرییله شدیداً خطره دوشوب و بو وضع، محله‌نین هاوا، توپراق و سو تمیزلیگینه و اکینچی‌لیگه، اوزون مودّتده ضرر وئرمکده‌دیر.
شهر اینسانلاری، دونیایا آیاق اویدورماق* تحوّولاتیندا، حتی بعضی میللی و دینی ده‌یرلردن* هزینه وئرمکده ایکن*، داها تمیز و صمیمی قالان محله‌نین حاققی، بو اولمامالیدیر.
هر شئیه رغماً، «قره‌ملیک»، الینده توتماغا چالیشدیغی طبیعی و اینسانی گؤزللیک‌لرییله، «ایپک یولو» و یا «ترابزون یولو» اولاراق یاد اولونان و تبریزدن باشلاییب محله‌دن گئچه‌رک، یوزلرجه کیلومئتیر باشقا بیر شهر آدینا تاخیلمادان* –بو قدر شهر اولدوغونا رغماً- گئده بیلمه‌نین ساغلادیغی آیدینلیغی و تیجارت پیشه‌لیگی یاشامیش و یاشایاجاقدیر. والحاصل؛
« قره‌ملیک» گؤزلدیر.
رسول داغسر (توفارقانلی)
چردک: هسته
توخونماق: اَل وورماق
خوی: خلق و خوی
یئرلشیم یئری: سکونت یئری
ایلیشکی: رابیطه
قونوم: موقعیت
آیاق اویدورماق: هماهنگ اولماق
ده‌یر: ارزیش
ایکن،یکن: اولدوغو حالدا، در حالیکه
تاخیلماق: ایلیشیب قالماق